هنتكلم النهارده عن اسباب اني قررت اعمل كورس كيفيه اختيار شريك الحياه
الموضوع كان في دماغي بقالي فتره ودا لان للاسف انا بشوف ماساه جوا البيوت فقررت احاول اقدم مساعده بالذات للشباب الجديد. اتمني يكون كتاباتي مفيده ليكم. وقريب هيبقي في فيديو وسيشنات كمان تعليميه
الكورس هيبقي سهل جدا وحتي مش هستخدم فيه غير اللغه العاديه مش فصحي حتي. احنا عايزين امور عمليه شبعنا كلام نظري بقي
تعالوا نشوف اول سبب من اسباب اني قررت اعمل الكورس
السبب الاول : زياده نسبه الطلاق
تعالوا كدا مع بعض نروح محكمه الاسره ولا بلاش...... تعالوا نزور اي ماذون كدا ونشوف نسبه الطلاق عنده فى الشهر كام ونسبه الجواز كام . عارفين سنه 2019 كانت 237 الف حاله طلاق....... وطبعا 2020 ازيد..... دا كانوا لازقين فى وش بعض ليل نهار حجز صحي بقي 😂
لا بلاش تعالوا ندخل جوا كل عيله ونشوف كدا عملوا كام قاعده عرب للعريس والعروسه من اول جوازهم عشان يلزقوا فى الحياه اللى مش عايزه تكمل ديه (طيب ما انتوا عارفين انها غلط من الاول لان انتوا اللي اخترتوا غلط) 🤔
تعالوا نعدى كدا علي اي قسم شرطه ونشوف كام واحده عامله محضر لجوزها عدم تعدي او كام محضر تبديد عفش او او او الحاجات العجيبه اللى بتتعمل عشان الاتنين ينتقموا من بعض........ اصل كان ما بينهم حرب زوجيه مش حياه زوجيه ايوه بالظبط زى الايموشن دا 👀👀👀
شوفوا بقي كام حاله نفسيه لطفل لما تقعد معاه ويحكيلك شوف ماما بتعيط ازاي اصل بابا ضربها ولا شوف الولد وهو متشحتف يكلم باباه ومامته منعاه اصلهم خلاص بيحربوا بعض بالعيال
كل دا خلاني اعمل كورس عشان نوفر عليكم العذاب دا . الكورس مش تقليل من خبرتكم بس محدش كامل ولا فاهم كل شي وكلنا مهما عشنا هنفضل نتعلم وهدف تعلمنا اننا نرتاح واننا نعيش صح
الإبتساماتإخفاء